kyun...

jab sab kho jaata hai toh nazrein kaise milate hain apne aap se
jab sab chale jaatein hai toh manch khali sa kyun lagta hai
kisike hone na hone se duniya kyun banti hai
dil ke khone se khushiyan kyun milti hain
jab aate hain akele toh kisika milna zaruri kyun hota hai
bewafa jab itne hote hain toh wafa karna zaruri kyun hota hai
yun toh shayar hum nahi magar dil ke tutne se kavita kyun banti hai
tum nahi toh main kyun hoti hun
hum nahi toh sab kyun hota hai
sab kho kar bhi hum the aur ab sab ho kar bhi hum nahi
dur reh kar bhi pyaar tha, paas reh kar do ajnabi ban gaye
jo mere dil mein tha woh tum mein kyun na ho saka
jo hamare liye socha tha woh hamara kyun na ho saka
kyun sapne dekhte hain hum agar un mein pura hone ki shakti nahi
kyun kehte hain kisiko apna agar hum mein unhe chahne ki bhakti nahi
har pal jo socha tha tumko woh tum the hi nahi yeh jaana kyun humne
har pal jo humse banta tha woh hum kuch tha hi nahi yeh samjha humne
aankhein khulti hai toh phir der se kyun
raat bhi hoti hai toh phir woh kat jati nahi kyun
intezaar karte karte nazre thak jaayein magar guzre pal phir wahin nahi hote
zindagi ke har faisle sahi kyun nahi hote
nasamjhi kyun ban jaatein hain hum ek pal mein
jise jaan kar baithe the woh ajnabi kyun ban jaatein hain
kehne nahi dete kisiko ek lafz tumhare khilaaf
phir ek pal mein mere maayne kaise badalne dete ho tum
jab khamosh rehna tha toh keh rahe the pyaar karte ho tum
aur ab khamoshi jaan le rahi hai toh mud ke bhi na dekh rahe ho tum
rukti nahi yeh chalne wali saansein kyun apne aap
kyun mere siddhant mujhe chod nahi dete ek pal apne saath
behna chahun main agar samay ki dhara mein
toh samay kyun mujhe maat dene ki koshish kar raha hai
har cheez jise pooja maine woh kyun mera saath chod raha hai
agar pyaar hi sab kuch hai, vishwaas hi sab kuch hai
toh tutne kyun dete hain hum inhe
agar hum tum ek duniya hai
toh chootne kaise dete hai raah mein hum inhe
kagaz par kagaz bhar doon sawalon se
par jawab milne se raha mujhe
ke kisike hone se duniya kyun banti hai
ke dil ke khone se khushiyan kyun judi hoti hain...